O, peyğəmbər (s) xislətli idi – 2 –ci hissə.

Alim ölməz, alim ölüləri də dirildər…
Bu gün (03.12.2016)  mərhum ustad Ələkbər Həsənzadənin 40 mərasimi idi. Bəli, artıq 40 gün keçdi. Amma hələ də onun yoxluğu ilə barışa bilmir onu sevənlər.  Sanki biz yuxu görürük deyirlər...
Bu gün mərhumun 40 mərasimində iştirak etdim.  Məclis boyu haqqında gözəl sözlər, xatirələr və ustadın gözəl əxlaqından maraqlı məqamlar qeyd edildi.  Eşidib gödüklərimi sizinlə də paylaşmaq istədim.
Bilmirəm niyə, amma məclisdə qəlbimdə, qəribə bir rahatlıq, aramlıq peyda olmuşdu. Məclisdə mərhum ustadın tələbələri, dost və tanışları hətta uzaq məsafələri qət edib gələnlər də var idi. Mərhum ustadın elmə və biliyə verdiyi dəyərdən danışanlar qeyd edirdilər ki, o evini iki hissəyə bölmüşdü. Bir hissədə yaşayışı təmin etmiş, digər hissədə isə kitablarla dolu rəfləri vardı.  Maraqlısı budur ki, kitablara ayırdığı otaq, digərindən daha böyük idi. Özü maddi cəhətdən çətinlik çəkməsinə baxmayaraq, insanlara  təmənnasız xidmət edir və əcrini Allahdan istəyirdi.  Hələ sosial şəbəkələr olmayan bir zamanda o mərhum mail.ru ilə öz təbliğatını aparırdı.  Təbliğ üçün hər şəraiti dəyərləndirirdi...
Mərhumun bir yaxın qohumu ilə həmsöhbət oluram.  Mənə o mərhumdan danışır.  Mərhuma bir nəfər vəsiyyət edibmiş ki, mən ölsəm sən mənim cənazə işlərimlə məşğul ol. Amma iş elə gətirib ki, vəsiyyət edən özü onun cənazə işləri ilə məşğul olmalı olub.  Xəstələndiyi zaman, özünü xalq təbabəti ilə, təbii üsullarla müalicə edirdi.  Fiziologiyası təbii müalicəyə o qədər öyrəşir ki, son günlərdə həkimin yazdığı kimyəvi dərmanları qəbul edərkən, “bu dərmanlar məni narahat edir” deyərmiş. Mərhumun bir nəvəsi də vəfatından 3 gün öncə dünyaya gəlibmiş. Uşağa ad qoymaq üçün onu gözləyiblər ki sağala. Amma kim bilə bilərdi ki, bu uşağa ad qoymaq ona nəsib olmayacaq.  Bu sözləri bir yaxın qohumu danışır mənə. Hərdəm susur, sonra yenə davam edir. Mərhumun dünyada etdikləri işləri indilərdə anlayıram deyirdi. Hərdəm biz öz aramızda deyərdik  ki, niyə bu uşaqlarla, nəvəsi yaşda cavanlarla, sosial şəbəkədə yazışır, danışır və onlara vaxt ayırır?  Bunu biz anlaya bilmirdik.  Bir qədər susur yenə...  İndi anlayırıq səbəbini.  Vəfatından sonra öyrəndik ki, yaxın qohumumuz olan bu kişi kim idi. Cavanlar,  gənclər fəsad və  günaha bulaşmasın deyə onları dərslərinə dəvət edir, gün boyu onların xidmətində olurdu. Xəstə olduğu zamanlarda belə məscidə getməyi tərgitmədi. Camaat namazında qalxıb əyləşərkən görürdük ki, çətinlik çəkir. Amma bununla belə yenə də gedirdi. Tələbələri hər dəfə təəssüflə, “niyə bu qədər arxayın olduq, niyə lazımı qaydada istifadə edə bilmədik” deyə köks ötürürdülər.  Onun barəsində o qədər eşitdim ki, hərdəm mənə elə gəlir ki, bu mərhumu hamıdan çox mən tanıyıram.Sanki, nə vaxtsa həyatımda yeri olub...
Yollanırıq məzarlığa...  Bir şerdən bir misra xatırlayıram məzarı görər-görməz...
Bu dünya olsa da insana düdman,
Soyuq məzara da zinətdir insan.
Məzarı önündə ruhuna dualar oxunur. Gözlər nəmli, ürək dərdli...  Qəlb sözlə dolu olsa da, hamı susmağa üstünlük verir. Sukütun özü bəlli edir hər şeyi. Soyuq külək özünü məzar daşına çırpır. Sanki, torpaq da ağuşuna aldığı qonağı çoxdan gözləyirmiş.   O mərhum, indidə qəbiristan əhli üçün bir rəhmətə çevrilib. Bir çox, ölülər bəlkə də hər gün nə qədər sevinir ki, o mərhum onların olduğu məzarlıq torpağına dəfn olunub. Axı mömin bir bəndəyə hörmət əlaməti olaraq Allah onların da əzabını yüngülləşdirər...
Mərhum ustad, həm dirilər üçün həm də ölülər üçün faydalı oldu. Məhz belələri barədə Allah buyurur: “Doğulduğu gün də, öləcəyi gün də, yenidən dirildiləcəyi gün də ona salam olsun! Məryəm sürəsi 15)
Mahir Şəkərov – İlahiyyatçı-yazar.
img-20161203-wa00071

Yorumlar

Yorum Gönder

Bu blogdaki popüler yayınlar

Müəllimə hörmət, Allaha və Onun Rəsuluna (s) hörmətdir

Resim
Ən şərəfli peşələrdən biri məhz müəllimlikdir. Hansı peşənin sahibi olursa olsun, müəllimə ehtiyaclıdır. Nəzərə alaq ki, müəllimin özü də müəllimə möhtacdır. Yeganə müəllim Allahdır ki, hər bir şeydən ehtiyacsızdır. Müəllimlik peşəsi müqəddəs bir peşədir. Bu müqəddəslik o qədər alidir ki, uca Yardanımız belə özünü müəllim adlandırır: “Allah insana Quranı öyrətdi.” (“Rəhman” surəsi, 1-2-ci ayə) “Allah insanlara bilmədiklərini öyrətdi.” (“Rəhman” surəsi, 5)   “Allah Adəmə müəllimlik etdi. Ona elm öyrətdi”. (“Bəqərə” surəsi, 31) Müəllimlik peyğəmbərlərin sifətlərindəndi. Allah byurur: “Peyğəmbərləri sizə müəllimlik etsin deyə göndərmişik.” Hədis: “Biz peyğəmbərlər ona görə gəlmişik ki, insanlara müəllimlik edək. Onlara bilmədiklərini öyrədək.” Müəllimlik o qədər ucadır ki, Həzrəti Əli (ə) buyurardı: “Kim mənə bir hərf öyrətsə ona qul olaram” Müəllimə necə hörmət edək? Bir neçəsini qeyd edək: 1. Həzrəti Əli (ə) buyurur: Şah da olsan, hakim də olsan müəllimin gələ...
Devamı

"Radikal və Radikalizm." - Elmi terminin faciəli aqibəti

Resim
Radikal – Nədir radikal və kimdir radikal? Bəzilərinin bilib bilmədən danışdığı, haqq-nahaq istifadə etdiyi bir söz... Radikal fransız (bəzi kitablarda yunan (latın) ) sözü olub, köklü dəyişiklik tərəfdarı, mənasına gəlir. Əlbəttə bu onun ilk və bir mənasıdır. Bu söz müxtəlif elmi sahələrdə də istifadə edilmişdir. Radikal sözü elmdə. Radikal sözü Riyaziyyatda: “Kökalma əməliyyatını, eləcə də kökalmanın nəticəsini göstərən işarə (√).” Radikal sözü Kimyada: “Bir birləşmədən digərinə dəyişikliksiz keçən atomlar qrupu.” Radikal sözü Siyasətdə: “Baxışlarında və dəyişikliklərdə kəskin mövqe tutan və radikalizm tərəfdarı olan şəxs.” “Radikallar partiyasının (sol siyasi partiyalardan birinin) üzvü, yaxud onun tərəfdarı olan şəxs (bu partiyaların proqramında dövlət çərçivəsində və onun mənafeyinə uyğun olaraq demokratik islahat irəli sürülür).” Radikal sözü, lüğətdəki mənaları. Radikal sözünün xüsusi mənası: - Radikal odur ki, fikir və ya əməldə həddi aşır. (Unutmayaq ki...
Devamı

Dünyasını dəyişənlərə ağlamaq və onlara yas saxlamaq olarmı? (Quran, hədis, tarix)

Resim
Ağlamaq fitri bir işdir: Əvvəla bunu bilək ki, insanın ağlaması fitri bir məsələdir. Yəni bu işi Allah özü insanın daxilində qərar vermişdir. Elə buna görə də heç bir ilahi hökm insan fitrətinə zidd deyildir. İnsanoğlu yaşayışında müxtəlif hadisələrlə qarşılaşır. Hadisələr gərəyi bəzən insan gülür bəzən isə ağlayır. Ağlamaq və gülmək insanoğlunun təbii ehtiyacıdır. İnsana üz verən müsibət zamanı ağlamaq insanı daxili böhrandan, acıdan uzaqlaşdırır. İnsan bəzən qəm və qüssədən ağalayarkən, bəzən isə sevincdən ağlayır. Dilimizdə də istifadə olunan “sevinc göz yaşları” bu halın sözlə ifadəsidir. Göz yaşı qəlbdə olan acının kədərin görünən formasıdır. Göz yaşı batindəki acının zahirdəki təcəssümüdür. Quran və dini rəvayətlərdə gəlmişdir ki, insan ağlamaq vasitəsi ilə qəlbinin pasını təmizləyir və tövbə üçün zəmin yaradır. Tövbənin daha tez qəbul olunma şərtindən biri də ağlar gözlə edilən duadır. Bir sözlə ağlamağın insana həm tibbi, həm ruhi həm də siyasi faydası vardır. Saxta ...
Devamı