“Mən ona Ümid dedim.”


Mərhəmət, böyüyə hörmət, yardımsevərlik və s. ...
Bunlar hər insan övladının daxilində yer alan ülvi hislərdir, nemətlərdir. Onlara sahib çıxmasaq, o nemətləri əzaba çevirən alternativlər üzə çıxır.
Bəzən, ictimai nəqliyyatda ağsaqqal və ağbirçək insanlar ayaq üstə dayanarkən nəvəsi ya övladı yaşda biri rahat əyləşərək onlara yerini vermək istəmir. Bu mövzuda foto və qınaqlar da zaman-zaman yayılır və müzakirə obyektinə çevrilir. Bu mənzərələr qarşısında təəssüf hissi keçirərkən ümid verici və qürürlandırıcı mənzərələrlə rastlaşırıq. İki fərqli zamanda şahidi olduğum iki hadisəni sizlərlə bölüşüm;
“İctimai nəqliyyatda yol gedərkən, 14 yaşlı bir uşaq oturacaqda oturmuşdu. Qoca bir qadın içəri daxil oldu. Oturacaqda uşaqdan savayı, 30-35 yaş aralarında qadın və kişilər də əyləşmişdi. Uşaq sağa sola boylandı və ayağ qalxaraq qoca qadına yerini göstərdi. “Otur qızım. Mən növbəti dayanacaqda düşəcəyəm.” deyə qadın dilləndi. Lakin, uşaq təkidlə oturmasını xahiş etdi. Və qadın əyləşdi və dərindən bir ah çəkdi.”
“Növbəti dəfə yenə 10-11 yaşlı bir uşaq anası ilə ayaq üstə dayanıb. Növbəti dayanacaqda  bir oturacaq boşaldı. Ora kim əyləşsin? Ana, kiçik yaşlı uşaq, yoxsa əlində çantası olan bir qoca kişi? Uşaq cəld özünü boş oturacağa atdı və anasını da yanına səslədi. Anası ona ayaq üstə olan yaşlı kişini göstərir və “babaya yol ver” deyirdi. Uşaq bir an duruxur və ayağa qalxaraq “baba gəl” deyir. Yaşlı kişi qadına əyləşməsini xahiş edir. Qadın isə təkidlə onun əyləşməsini istəyir. Daha sonra kiçik yaşlı uşaq “baba gəl, mən oturmaq istəmirəm, gəl sən əyləş. Nə olar baba gəldə...” deyə səsləyir. Bu məsumanə çağırış o qədər təsirli olur ki yaşlı kişi onu öpür və təşəkkür edir.”
Bu mənzərələr qarşısında insan yenə gələcəyə ümidlə baxır. O kiçik yaşlı uşağın adını bilməsəm də mən ona “Ümid” dedim. Təəssüf hissimizi boğaraq gələcəyə ümidlə baxmağı bizə əməli şəkildə öyrədən kiçik Ümidlər. Bu Ümidlər cəmiyyətdə çoxalsa, hər şeyin yaxşı olmağına hələ ki ümid var.

Mahir Şəkərov - İlahiyyatçı yazar.
 

Yorumlar

Yorum Gönder

Bu blogdaki popüler yayınlar

Müəllimə hörmət, Allaha və Onun Rəsuluna (s) hörmətdir

Resim
Ən şərəfli peşələrdən biri məhz müəllimlikdir. Hansı peşənin sahibi olursa olsun, müəllimə ehtiyaclıdır. Nəzərə alaq ki, müəllimin özü də müəllimə möhtacdır. Yeganə müəllim Allahdır ki, hər bir şeydən ehtiyacsızdır. Müəllimlik peşəsi müqəddəs bir peşədir. Bu müqəddəslik o qədər alidir ki, uca Yardanımız belə özünü müəllim adlandırır: “Allah insana Quranı öyrətdi.” (“Rəhman” surəsi, 1-2-ci ayə) “Allah insanlara bilmədiklərini öyrətdi.” (“Rəhman” surəsi, 5)   “Allah Adəmə müəllimlik etdi. Ona elm öyrətdi”. (“Bəqərə” surəsi, 31) Müəllimlik peyğəmbərlərin sifətlərindəndi. Allah byurur: “Peyğəmbərləri sizə müəllimlik etsin deyə göndərmişik.” Hədis: “Biz peyğəmbərlər ona görə gəlmişik ki, insanlara müəllimlik edək. Onlara bilmədiklərini öyrədək.” Müəllimlik o qədər ucadır ki, Həzrəti Əli (ə) buyurardı: “Kim mənə bir hərf öyrətsə ona qul olaram” Müəllimə necə hörmət edək? Bir neçəsini qeyd edək: 1. Həzrəti Əli (ə) buyurur: Şah da olsan, hakim də olsan müəllimin gələ...
Devamı

"Radikal və Radikalizm." - Elmi terminin faciəli aqibəti

Resim
Radikal – Nədir radikal və kimdir radikal? Bəzilərinin bilib bilmədən danışdığı, haqq-nahaq istifadə etdiyi bir söz... Radikal fransız (bəzi kitablarda yunan (latın) ) sözü olub, köklü dəyişiklik tərəfdarı, mənasına gəlir. Əlbəttə bu onun ilk və bir mənasıdır. Bu söz müxtəlif elmi sahələrdə də istifadə edilmişdir. Radikal sözü elmdə. Radikal sözü Riyaziyyatda: “Kökalma əməliyyatını, eləcə də kökalmanın nəticəsini göstərən işarə (√).” Radikal sözü Kimyada: “Bir birləşmədən digərinə dəyişikliksiz keçən atomlar qrupu.” Radikal sözü Siyasətdə: “Baxışlarında və dəyişikliklərdə kəskin mövqe tutan və radikalizm tərəfdarı olan şəxs.” “Radikallar partiyasının (sol siyasi partiyalardan birinin) üzvü, yaxud onun tərəfdarı olan şəxs (bu partiyaların proqramında dövlət çərçivəsində və onun mənafeyinə uyğun olaraq demokratik islahat irəli sürülür).” Radikal sözü, lüğətdəki mənaları. Radikal sözünün xüsusi mənası: - Radikal odur ki, fikir və ya əməldə həddi aşır. (Unutmayaq ki...
Devamı

Dünyasını dəyişənlərə ağlamaq və onlara yas saxlamaq olarmı? (Quran, hədis, tarix)

Resim
Ağlamaq fitri bir işdir: Əvvəla bunu bilək ki, insanın ağlaması fitri bir məsələdir. Yəni bu işi Allah özü insanın daxilində qərar vermişdir. Elə buna görə də heç bir ilahi hökm insan fitrətinə zidd deyildir. İnsanoğlu yaşayışında müxtəlif hadisələrlə qarşılaşır. Hadisələr gərəyi bəzən insan gülür bəzən isə ağlayır. Ağlamaq və gülmək insanoğlunun təbii ehtiyacıdır. İnsana üz verən müsibət zamanı ağlamaq insanı daxili böhrandan, acıdan uzaqlaşdırır. İnsan bəzən qəm və qüssədən ağalayarkən, bəzən isə sevincdən ağlayır. Dilimizdə də istifadə olunan “sevinc göz yaşları” bu halın sözlə ifadəsidir. Göz yaşı qəlbdə olan acının kədərin görünən formasıdır. Göz yaşı batindəki acının zahirdəki təcəssümüdür. Quran və dini rəvayətlərdə gəlmişdir ki, insan ağlamaq vasitəsi ilə qəlbinin pasını təmizləyir və tövbə üçün zəmin yaradır. Tövbənin daha tez qəbul olunma şərtindən biri də ağlar gözlə edilən duadır. Bir sözlə ağlamağın insana həm tibbi, həm ruhi həm də siyasi faydası vardır. Saxta ...
Devamı